Iha ambitu komemorasaun loron mundial saude mental iha tinan 2025, PRADET organiza atividade family link ho familia kliente sira iha Postu Administrative Railaco, munisipiu Ermera. Atividade reuniaun liga familia hanesan meios hametin koperasaun entre familia kliente, profesionais saude no PRADET atu fahe informasaun ba malu ligado ho meios kuidadu membru familia nebe hetan problema moras mental, desafius no preokupasaun sira ligado ho kapasidade ka kbiit familia no parte sira hodi tau matan ba membru familia nebe hasoru problema moras mental no mos oinsa parte sira bele servisu hamutuk hodi fo atendementu diak no intensivu ba membru familia sira nebe hasoru problema moras mental.
Atividade ne’e partisipa mos kliente feto no mane ida ne’ebe rekopera ona, no iha sira nia esperiensia sira espresa: Hau ema ne’ebe agresivu los wainhira seidauk hetan tratamentu maibe hafoin hetan tratamentu no suporta masimu husi familia hau senti di’ak los, hau kontenti los tamba bele halo atividade hanesan uluk. Familia kliente senti kontenti no motivadu tebes husi informasaun ne’ebe sira simu husi PRADET no doutor sira liu-liu hodi bele tulun di’ak liu tan sira nia membru famiia ne’ebe moras mental.
Atividade relevansia seluk hodi prience tempu komemorasaun loron saude mental ne’e maka, PRADET mobiliza maluk sira ho kondisaun defisiensia mental nain 12 hodi partisipa iha atividade celebrasaun loron saude mental organiza husi Asosiasaun Defisiensia Timor Leste-ADTL. Iha tempu ne’ebe hanesan kliente sira hamutuk ho partisipante sira seluk hare hamutuk video motivasaun badak ne’ebe produs husi ADTL. Kliente sira senti haksolok tanba bele iha divertementu ho kolega sira seluk.
