Universidade Dili (UNDIL) realiza akordu tekniku ho PRADET atu fornese oportunidade ba estudante UNDIL, Departamentu Enfarmajen hamutuk ema nain 248 hodi halao estudu pratika iha area saude mental durante fulan 2 iha PRADET.
Nune’e, PRADET liu-husi Programa Asistensia Moras Mental (PAMM) halo orientasaun ba estudante sira foku ba maneira aprosimasaun no oinsa fornese asistensia ba kliente sira liu husi atividades oin 3 hanesan; atividade Rehabilitasaun, atividade Dalan Ninin no atividade prevensaun Stigma Diskriminasaun hasoru ema ho problema mental. Rotativamente estudante sira partisipa hodi aprende kona-ba fornesementu asistensia terapia rehabilitasaun ba kliente ne’ebe hetan ona tratamentu mediku, vizita kliente iha komunidade hodi aprende kona-ba maneira servisu asistensia ba kliente sira ne’ebe hetan stigma no diskriminasaun husi familia no komunidade no vizita kliente abandonadu iha Dalan Ninin hodi fornese asistensia bazika hanesan ai-han, kuidadu hijeniku no tulun seluk.
Iha okasiaun ne’e, estudante sira halo interasaun direta ho kliente hodi fornese asistensia hijeniku no hetan akompanamentu husi ekipa teknika PAMM. Iha loron ikus, ekipa PAMM realiza sesaun reflesaun ho estudante sira hodi fahe saida mak sira aprende hamutuk no hetan apresiasaun husi PRADET.
