Sesaun formasaun prátika loron tolu ne’ebé fasilita husi PRADET Timor-Leste liu-husi nia Programa Empoderamentu Sósiu-Ekonómiku fó ona inspirasaun ba benefisiáriu feto lokál nain 8 atu hanoin fila-fali sira-nia aprosimasaun ba dezenvolvimentu empreza eskala ki’ik. Formasaun ne’ebé hala’o iha Fatin Hakmatek Oecusse ne’e, hanesan edukasaun non-formal basika atu aumenta matenek benefisiáriu nain 8 ne’e sira nian antes hahu atividade negosiu.
Formasaun ne’ebé hala’o fasilita hosi formador sira hosi Departamentu Pekuária, Diresaun Agrikultura, Diresaun Komérsiu no Indústria, no PRADET rasik, sesaun sira kobre tópiku sira hanesan hakiak animál ho eskala ki’ik, identifika oportunidade negósiu, no jestaun finanseira.
Cipriano Agustinho Daos peritu ida kona-ba hakiak animál, introdús ba partisipante sira kona-ba estratéjia hakiak manu, bibi, fahi no karau iha nivel uma-kain. Reflete kona-ba impaktu hosi ninia sesaun sira, nia nota, “Ida-ne’e la’ós ha’u-nia primeira-vez fó formasaun ba benefisiáriu PRADET sira iha Oecusse. Tinan-tinan, ha’u haree ideia sira ne’ebé kontinua hadi’a, no ha’u sente kontente hodi asiste kliente foun sira adopta estratéjia sira-ne’e iha tinan ne’e.”
Iha loron daruak, Domingas Sufa husi Diresaun Komérsiu no Indústria lidera sesaun kona-ba identifika modelu negósiu eskala ki’ik ne’ebe viável no estuda ka planu kona-ba sustentabilidade. Programa ne’e konklui ho formasaun literasia finanseira husi Francisco Pui, Prezidente União Cooperativa Oecusse, ne’ebé introdús partisipante sira kona-ba orsamentasaun, kálkulu lukru, no estratéjia poupansa ba negósiu uma-kain no komunidade sira.
