Diretóra Jerál Prestasaun Saúde, Dra. Odete da Silva Viegas ho Diretór Jerál MSSI, Florencio Pina Gonzaga, sesta ne’e realiza assinatura hamutuk Guia Tratamentu Psikiatria, iha Palácio das Cinzas, Díli.
Diretóra Jerál, Dra. Odete Viegas revela, Ministériu Saúde (MS) nia programa moras la hada’et ida mak Saúde Mental, programa ne’e rasik sai mós hanesan prioridade importante ida ba MS ne’ebé serbisísu hamutuk ho liña Ministerial ne’ebé relevante nomós sosiedade sivíl, Igreja, parseiru ne’ebé mak kontribui ba iha papel saúde mental.
Guia tratamentu psikiatria ne’e ajuda profisionál sira atu reforsa programa moras la hada’et, liuliu unidade saúde mental atu serbí di’ak liután ema ne’ebé sofre difisiensia mental.
“Tinan naruk nia laran durante ita restaura ita-nia Independensia, serbísu ne’e hahú implementa tiha kedas ona, maibé ita hotu hatene katak infelizmente programa la’o maibé apoiu rekursu orsamentu lojístika, apoiu dignostika sai mós bareira importante ida oinsá knaar na’in saúde sira bele asegura ita-nia ema sira ne’ebé mak presiza ita-nia tulun atu bele fó atendimentu iha oras 24, ida ne’e hanesan mós responsabilidade ida mai ita hothotu ne’ebé serbísu besik liu ba iha ita-nia pasiente sira mak sofre hela moras mental”.
Iha oportunidade hanesan, Diretóra Jerál Prestasaun Saúde, Dra. Odete da Silva Viegas hala’o mós lansamentu Padraun Procedimentu Operasional Integrada para a Transferência de Saúde Mental no Apoio Psicossocial ba Komunidade iha Timor-Leste.
“Ita kuandu ko’alia kona-ba moras mental ida-ne’e assuntu ida mak ita tratamentu ba ema moras, ita trata ema-nia metal psikolojikamente atu hetan moras, afeta mós ba família, i afeita mós ba iha komunidade, maibé esforsu ne’ebé ita halo to’o ohin loron ita haree katak prosedimentu ne’ebé mak profisionál saúde sira presiza halo tuir ida-ne’e ita presiza tau duni iha fatin atu nune’e wainhira mosu problema ruma ita la’o ne’e bazeia ba saidá, entaun prosedimentu operasionais nomós integradu signifika katak ita haree ba problema integradu oin nu’usa ita atu halo sistema referal ida ne’ebé mak di’ak”, DG Odete destaka iha diskursu.
Wainhira identifika kazu ruma ne’ebé mak labele trata iha fatin, maibé oinsá atu halo tranferensia moras ida ba fatin adekuadu, nune’e MS ho apoiu husi parseiru sira hotu ne’ebé serbisu iha área ida-ne’e kria ona prosedimentu ida iha manual ne’e. Guia refere harekerk mós oinsá trata b moras sira, ida-ne’e mak guia importante ne’ebé médiku enfermeiru psikolojia sira presiza atu haree, atu bele mós ho hala’o iha sira-nia atendimentu.
