Haforsa servisu saude mental ho Servisu Saude Munisipiu Dili
Iha Fulan Marsu 24, 2025, PRADET entrega pakote IEC material ba Servisu Saúde Munisípiu Dili reprezenta husi Jestór Kazu. Eventu ne’e ofisialmente lansa husi Diretur Servisu Munisípiu Dili, Xefi Seksaun Saúde Mentál, no Diretur PRADET. Objetivu husi entrega IEC material ne’e atu suporta promotór servisu promosaun saúde mentál hodi promove informasaun saúde mentál no hasa’e konsiensia ba fornesidór servisu sira ne’ebe eziste iha komunidade.
Iha abertura Diretur Servisu Saúde Munisípiu Dili hato’o nia apresiasaun maximu ba PHD no PRADET tanba dezenvolve no produs ona informasaun importante hirak ne’e. Nia rekoñese katak servisu saúde iha Sentru Saúde komunidade no postu saúde presija tebes treinamentu no rekursu adekuadu hodi suporta sira nia servisu ba atendimentu ema ho moras mentál.
Iha tempu ne’ebe hanesan, Diretur PRADET reafirma organizasaun nia komitmentu hodi sai ponti ba suporta servisu saúde mentál, nune’e nia re-forsa entrega IEC material ne’e akontese tanba hetan suporta husi PHD- nuudar parte ida husi servisu hamutuk entre parseiru ba promove saúde mentál iha komunidade.
Eventu ne’e partisipa husi ema nain 12, akompaña mós ho asina termu entrega entre PAMM-PRADET Team Leader no Jestór Kazu Munisípiu Dili no ne’ebé akompanha husi Diretur Servisu Saúde Muníspiu Dili no PRADET.
IEC material ne’e kompostu husi brosura no poster ba iha informasaun saúde mentál hanesan; depresaun, estress, prevensaun suisidiu, no informasuan bem estar. Informasaun hirak ne’e sei distribui ba iha sentru saúde no postu saúde liu-husi Munisípiu Dili hodi sai hanesan rekursu importanta ba iha servisu saúde profesioná no públiku sira.
