Dia, 23-24 Abril 2025, Organizasaun PRADET liu husi Programa Empoderamentu Feto (Girls Empowerment Program-GEP) ne’ebé hetan apoiu orsamentu husi UNICEF fó suporta kioske no animál (Bibi) ba adolesente feto nain 4 iha Suku Builale no Suku Ossurua, (Ossu-Viqueque) no mós Suku Samalete no Suku Tarasu, (Railaku-Ermera).
Iha adolesente nain 58 iha suku Builale, Ossurua, Samalete no Taraso ne’ebé hetan ona formasaun abilidade moris husi programa GEP. Husi total adolesentes sira ne’ebé partisipa iha formasaun, iha adolesente nain 4 ne’ebe kondisaun ekonomia iha familia kategoria vulneravel, no sira nain 4 simu apoia negosiu kiik husi PRADET hanesan kioske no hakiak animal. Objetivu husi apoiu ne’e mak atu eleva no ajuda adolesente feto sira ho família hadi’a sira nia vida ekonomia iha uma laran.
Molok atu simu apoiu negosiu, PRADET hamutuk ho parseiru koperativa lokal hanesan Prezidenti CUB (Coperativa Uniaun Builale), HAFA (Hadia Familia), no Madesa (Matadalan Dezenvolve Samalete) fahe informasaun ba adolesente no familia kona-ba jere nogosiu, literasia finanseiru no planeamentu. Aliende ne’e adolesente hirak ne’e hetan mos formasaun kona-ba oinsá hakiak animál ho di’ak liu-husi halo identifikasaun, tratamentu, no prepara fatin ne’ebé seguru no hijiene husi Xefi Planeamentu Dezenvolvimentu.
Iha nia formasaun Xefi Planeamentu Dezenvolvimentu Sr.Guterres metaforikamente dehan;
“Apoiu ne’ebé Organizasaun PRADET fó hanesan kail ida la’ós ikan, tanba ikan ita sona han hotu ona maibé, kail tenki iha prosesu naruk ida oinsá atu buka iska no oinsá mak atu kail ikan. Signifika katak Apoiu ne’ebé PRADET fó atu loke ita-nia dalan hodi hadi’a ekonomia, simu apoiu ne’e utiliza tuir nia dalan no koko atu halo buras liután hodi nune’e ita bele hetan rezultadu ne’ebé ita no ema seluk hakarak”.
Autoridade lokál no família adolesente hato’o agradese wain ba UNICEF liu husi PRADET ne’ebé fó apoiu no sira sei nafatin kontrola no kuidadu sasan no animal ne’ebe sira simu.
